Sogn

Draktskikken i Sogn bygger mest på materiale frå indre strøk, men går under namnet "Sognebunad". Den kom i bruk tidleg på 1900-talet og tek utgangspunkt i draktskikken slik den var ein periode på 1800-talet. På den broderte borden nede på skjørtet kan ein velje mellom fargane grøn, burgunderraudt eller blått.

Vest
Vesten er laga i brokade av viskose eller silke, og er fôra med baskerlin. Dei vanlegaste fargane er i svart, burgunderraud eller grønt, men gult er også ei moglegheit. Rundt forkant og ermehol er vesten kanta med svart fløyel. Vesten er sydd fast til skjørtet.

Skjørt/Stakk
Skjørtet er laga i svart ullstoff og er rynka i midja. Nedst på skjørtet er det ein brodert kant i ei kontrastfarge. Fargane på skjørtekanten kan vere i grønt, burgunderraudt eller blått. Skjørtet har ei smal linning i livet som er sydd fast til vesten.

Belte
Beltet er laga i svart, elastisk fløyel og blir lukka med ei sølvspenne. Om ønskeleg kan ein også bruke sølvbelte.

Forkle
Forkleet blir laga i tettvevd ullstoff med ruter og striper vevd inn i fargane raudt, gult og grønt. I midja er forkleet kanta med eit svart silkeband som blir forlenga og knytt bak.

Skjorte
Ein kan velje mellom to ulike skjorter til bunaden: kvitbrodert linskjorte eller grøn silkeskjorte.

Kvit skjorte: Skjorta er laga i lin med svart broderi på krage, mansjettar og bringelist.

Grøn skjorte: Skjorta er laga i silkeduchess med opning i front som blir knept med sølv- eller tinnknappar. Skjorta har ikkje krage. Under skjorta blir det brukt ei kvit halvskjorte i lin med brodering på kragen. I tillegg er det lause broderte mansjettar i lin som er festa til skjorta.

Anna
Det skal vere svarte strømper og bunadsko til bunaden. Som ytterplagg brukar ein vanlegvis cape.